பேஸ்மாஸ்க்கை எப்போதும் போடாமல் கூட்டமாய்
டாஸ்மாக் கடையிலே முந்துவார் ---- ஈஸ்வரனே
வந்துரைத் தாலும் திருந்தார் இவரைநாம்
நொந்தென்ன காண்போம் பயன்?
(பலவிகற்ப இன்னிசை வெண்பா)
ஏராள மாகவே என்னவிலை சொன்னாலும்
ஆராய்ச்சி சற்றுமே செய்யாம லேயுடன்
தாராள மாய்ப்பணத்தை தாரைவார்த் தேதருவார்
சாராயச் சாருண்ப வர்!
(ஒருவிகற்ப இன்னிசை வெண்பா)
எவ்விலை ஆயினும் வாங்கிக் குடிப்பார்
உயிர்குடிக்கும் சாராயச் சாரை - உயிர்காக்கும்
ஊசியைப் போடவே நூறுதடை சொல்லுவார்
ஓசியாய் வாராத தால்!
(பலவிகற்ப இன்னிசை வெண்பா)
கிண்டி பாம்புப் பண்ணை
சென்னையில் வசிப்பவர்களுக்கும், சென்னைக்கு வருபவர்களுக்கும் , அந்தக் காலத்தில் , பார்க்கவேண்டிய ஒரு சுற்றுலாத் தலமாக இருந்தது கிண்டியில் இருக்கும் பாம்புப் பண்ணை.
பாம்புகளிடமிருந்து விஷத்தை எடுத்து, அவ்விஷத்தையே பாம்புக் கடிக்கு மாற்று மருந்தாக மாற்றும் பணியும் இங்கு நடைபெருகிறது.
இன்று , ஊரடங்கால் சுற்றுலாப் பயணிகள் வருவது முற்றும் தடைப்பட்டு , வருமானமின்றி , அங்குள்ள பாம்புகளுக்கு இரையளிக்கவும் முடியாத நிலையில் இருக்கிறது என்பது இன்றைய பத்திரிகைச் செய்தி.
நம்மால் ஆன உதவிகளைச் செய்ய வேண்டி, இதைப் பற்றிய ஒரு பாடலுடன்
அன்பன்
ரமேஷ்
ஆலத்தை* யேமாற்றி ஔடதமாய்** ஆக்கிவிடும் *ஆலம் = நஞ்சு**ஔடதம் = மருந்து
ஜாலத்தை செய்கின்ற சர்ப்பச் சதுக்கத்தில் * *சர்ப்ப சதுக்கம் = பாம்புப் பண்ணை
பாலூட்ட பாம்பிற்கு காசில்லை ; இன்றதுதன்
காலூன்றி நிற்கா நிலை.
(ஒருவிகற்ப இன்னிசை வெண்பா)
பத்து மதிக்காலம் காத்துக் குழந்தைகளை
பெற்றெடுப்ப தொன்றும் புதிதல்ல- வேயாயின்
பத்துக் குழந்தைகளை ஆணேழு பெண்மூன்றாய்
கொத்தாகப் பெற்றவர்க்கு வாழ்த்து
(பலவிகற்ப இன்னிசை வெண்பா)
நேற்றுப் பெய்த மழை
நேற்று இரவு திடீரென்று பெருத்த இடியோசையுடனும், கண்ணைப் பறிக்கும் மின்னலுடலும் கூடிய பெருமழை பெய்யத் தொடங்கி, உறக்கத்திலிருந்து என்னை எழுப்பியது!
கிட்டத்தட்ட இரண்டு மணி நேரம் இடியோசையும் மின்னலும் அடங்கவில்லை!
அந்தப் பின்னணி இசையுடனேயே மீண்டும் உறங்கிவிட்டேன்!
காலையில் விழித்துப் பார்க்கையில் சற்றே வெளுத்த வானம், சிறு தூறலுடன் என்னை வரவேற்றது!
இது பற்றி ஒரு பாடல்!
அன்புடன்
ரமேஷ்.
நேற்றுப் பெய்த மழை
வகிடெடுத்து வெள்ளிமின்னல் வானைப் பிளக்கும்;
-----வெள்ளிமின்னல் ஒளியினிலே விண்ணும் ஜொலிக்கும்!
முகிலோடு முகிலுரசி மத்தளம் முழங்கும்
-----மத்தளங்கள் முழங்கொலியில் இத்தளம் நடுங்கும்'
முகிற்கூட்டம் மலைமுகட்டில் மோதித்துகி லுரிக்கும்.
-----துகிலுரியும் நேரத்தில் திகில்மழையைக் கக்கும்.
திகிலூட்டும் வகையினிலே பெய்யும்பெரு மழையால்
-----ஆறுகளும் ஏரிகளும் கரையுடைந்து ஓடும்
புகல்தேடி புட்கூட்டம் கூட்டுள் பதுங்கும்
-----விலங்குகளும் விரைந்தோடி மரத்தடியில் ஒதுங்கும்.
அகிலமே அழியுமென் றச்சமுறும் நேரம்
-----வீரியம் குறைந்து மழை தூரலாய் மாறும்
அகழாழி கள்நிரம்பி நீர்மட்டம் உயரும்
-----ஆற்றுவெள்ளம் சற்றடங்கி வாரியில் சேரும்.
சுகமாக அதிகாலைப் பொழுதிங்கு விடியும்
-----சூரியனின் காரியமும் சுறுசுறுப்பாய்த் தொடரும்!
பிரதோஷப் பாடல் - 39
என் நண்பர் என்.கிருஷ்ணமூர்த்தி கவி காளமேகத்தின் ரசிகர்.
அவர் என்னுடன் கீழ்க்கண்ட பாடலைப் பகிர்ந்து கொண்டார்.
காலனைக் காலால் உதைத்தான் - நீலவான்
நிலவைப் பறித்துத்தன் தலையில் தரித்தான்
மத்தகத் தோலினை உரித்தான் - மன்மதனை
நெத்திக் கண்நோக்கின் நெருப்பால் எரித்தான்
கழுவீசி முப்புரம் உடைத்தான் - அரக்கர்கோன்
கழுத்தைத் தன்கைகளின் விரலால் நெரித்தான்*
கோலவார் குழலி என்னம்மை உமையோடு
ஆலவாய் அமர்ந்த சிவனே!
இதற்கு முன்னுரை தேவை இல்லை!
அன்புடன்
ரமேஷ்
நானும் கூட - மீ டூ (ME TOO)
பொன்னும் மணியும் வீட்டில்
-----பெட்டியில் கொட்டிக் கிடக்க
இன்னமும் கூட வேண்டும்
-----வைரமும் முத்தும் என்று
கன்னமிட் டடுத்த வீட்டை
-----கள்ளமிட நினைத்த பேரின்
எண்ணத்தில் மண்ணைப் போட
-----எழும்புவேன் நானும் கூட!* * Me Too!
கற்றுக் கல்வியில் தேர
-----பள்ளிக்கு வந்தோ ருக்கு
கற்பிப்போர் வடிவில் வந்து
-----சிற்றின்பச் சுவையைக் காட்டும்
குறுஞ்செய்திக் கொத்தை அனுப்பி
-----குற்றச் செயல்கள் புரியும்
அற்பரை அடியோ டழிக்க
-----எழும்புவேன் நானும் கூட!* * Me Too !
கொரானா அலைகள்
எனக்கும், நம்மில் பலருக்கும், கொரானவின் முதல் தாக்குதலின் போது இருந்த மனநிலைக்கும், இப்போது வீசும் இரண்டாம் அலையின் தாக்குதலின் போது இருக்கும் மனநிலைக்கும் ஒரு பெரிய வேற்றுமை இருக்கிறது.
இது பற்றி ஒரு பாடல்!
உங்கள் கருத்து? அறிய ஆவலாக இருக்கிறேன்!
அன்புடன்
ரமேஷ்
முதலாம் அலை
முதலாம் அலையும் பலமாய் நம்மேல்
மோதிய போது வீட்டினுள் நாமும்
இதுவும் கடந்து போகும் என்று
பதுங்கி இருந்தோம் பாது காப்புடன் !
நாள்தோ ரும்தொலைக் காட்சிச் செய்திகள்
அள்ளித் தெளிக்கும் அவலக் கதைகளை
உள்ளத் துள்ளே இருத்தா தேயோர்
புள்ளிக் கணக்காய் மட்டும் பார்த்தோம் !
நாமும் நம்மைச் சார்ந்த நண்பரும்
மாமன் மருகன் பிற்பல உறவும்
சேமம் குன்றா திருப்பத னாலே
மாமூ லாய்நம் வாழ்க்கையைத் தொடர்ந்தோம்!
இரண்டாம் அலை
பின்பு வந்தயிவ் விரண்டாம் அலையோ
இன்று போடும்வெறி யாட்டம் தன்னில்
நன்கு பழகிய நண்பர்கள் சிலரும்
நண்பரின் நண்பர் என்பவர் பலரும்
தெரிந்தவர் உறவினர் அக்கம் பக்கம்
இருப்பவர் எனப்பலர் நோய்வாய்ப் பட்டு
எட்டி இருந்த நோய்த்தாக் குதலின்
வட்டம் சுருங்கி கிட்ட வருகையில்
முதலாம் அலையின் முழுவுளக் காட்சி * * perspective
முற்றிலும் மாறி பற்றின்மை* போய் *detachement
மனதினில் நிறையுது பெருங்கழி விரக்கம்* * empathy
மனிதம் மீண்டும் உயிர்த்தது என்னுள்!
