ஜே என் யூ போராட்டம்

ஜே என் யூ போராட்டம்

ஜே என் யூ போராட்டம்  கடந்த இரண்டு வாரங்களாக எல்லா தொலைக்காட்சிகளிலும் அல்லோல கல்லோலப் படுவது  ஜே என்  யு பற்றிய செய்திகளே ! முகமூடி அணிந்துகொண்டு இரண்டு கோஷ்டிகள் ஒருவரையொருவர் தாக்கிக்கொண்ட  கண்கொள்ளாக் காட்சியைக்  கண்டோம். முதலில் இது ஏதோ CAA பற்றி மாணவர்களின் எதிர்ப்பு பற்றியது என்று நினைத்தேன்.  பின்புதான் தெரிந்தது இது விடுதிக் கட்டணங்களையும் படிப்புக்கான வருடாந்திரக்  கட்டணங்களையும்   ஜே என் யூ நிர்வாகம் உயர்த்தியதை எதிர்த்து நடந்த்தப்படும் போராட்டம்  என்று! இதைத் தவிர , தங்கிப் படிக்கும் மாணவ மாணவிகளுக்கான சில கட்டுப்பாடுகள்  விதிக்கப்பட்டதை எதிர்ப்பதும் ஒரு நோக்கம். இது பற்றி சில விவரங்களைத் தேடிப் பிடித்துப் படிக்கையில் கட்டண உயர்வு பற்றிக்  கிடைத்த  தகவல்கள் முன்னுக்குப் பின் முரணாக இருந்தன. சில பத்திரிகைகள் இந்த உயர்வு  அமலுக்கு வந்தால் ஜே என் யூ கட்டணங்கள் மற்றவைகளை விட மிக அதிமாகும் என்றும் , மற்ற  பத்திரிகைகள் இதற்குப் பிறகும் ஜே என் யூ கட்டணம் குறைவாகவே இருக்கும் என்றும்  ( அவரவர்களுடைய அரசியல் நோக்கைப் பொறுத்து) எழுதின . எது உண்மை என்று நான்  இப்போது ஆராய விரும்பவில்லை. ஆனால்  தற்போதைய விடுதிக் கட்டணங்கள் எவ்வளவு  என்று ஆராய்ந்தபோது தெரிந்த தகவல் படி ஒரு நாள் வாடகை 10  ரூபாய்க்கும் குறைவு ,  ஒரு நாள் சப்பாட்டுச் செலவு சராசரி ரூபாய் ஐம்பது என்றும் தெரிய வந்தது!  படிப்பவர்கள் பெரும்பான்மையினருக்கு ஊக்கப் பணம் கிடைக்கிறது என்றும் அறிந்தேன்! அடடா!  ஜே என் யூ வில் படிக்கும் சாக்கில் நாமும்  டெல்லியில் தங்கி சுற்றி பார்க்கலாமே  என்று தோன்றியது! இது பற்றி ஒரு அங்கதக் கவிதை - எந்த அரசியல் கலப்பும் இல்லாமல்! அன்புடன்  ரமேஷ்  ஜே என் யூ இந்திய நாட்டின் தலைநகரில் தங்கி வசிக்கச் சிலவருடம் வந்தது எனக்கோர் ஆசையுமே வழியிதற்  கெதுவென ஆராய்ந்தேன் சொந்தங்கள் யாரும்  அங்கில்லை பெரிதாய்ப் பையில் காசில்லை இந்த நிலையில்நான் இருக்கையிலே நண்பன் ஒருவன் நயந்துரைத்தான். "ஒருநாள் தங்கிட வாடகையே ரூபாய் ஐந்து மட்டும்தான் மூன்று வேளை சாப்பாடோ முப்பது ரூபாய் மட்டும்தான் ஐந்து ரூபாய்க்கு டீகாபி ஆலு   பரோட்டா சமோசாவும் எந்த நேரமும் எளிதாக கிடைக்கும் வுண்டிச் சாலையிலே!. இந்த இடத்தில் நீ  தங்கி இரண்டு வருடம் இருப்பாயேல் முது கலைப் படிப்பும் முடித்திடலாம் படிக்கப் பணமும்  பெற்றிடலாம். இதுபோ தாதெனெ நீநினைத்தால் முனைவ ராகிடவும்  முனைந்திடலாம். பதறிடாமல் பல வருடம்  பாரதத் தலைநகர் பார்த்திடலாம்! எந்த இடமிது வெனக் கேட்டேன் வந்த பதில்கேட்டு வியப்புற்றேன் வாவென அழைத்து வரவேற்கும் ஜேஎன்யூவென அவன் உரைத்தான் !

நட்பின் எல்லை

கல்லூரி ஐம்பதாம் ஆண்டு நிகழ்வுக்காக எழுதியது. முன்னர் எழுதிய எல்லைகள் என்ற பாட்டை சற்று மாற்றி, கடைசி இரண்டு பத்திகளை சேர்த்து எழுதப்பட்டது.

நட்பின் எல்லை 

கனவின் எல்லை எது வரை ?
காலையில் விழித்து எழும்வரை. 
நினைவின் எல்லை எது வரை?
நித்திரை நம்மைத் தொடும்வரை.
ஒளியின்  எல்லை எது வரை?
கண்கள் மூடும் அதுவரை 
நட்பின்  எல்லை எது வரை? - யாரும்
கண்டது இல்லை இதுவரை.

வானின் எல்லை எது வரை?
கடலை வானம் தொடும்வரை?   
கடலின் எல்லை எது வரை ? 
அலைகள் தொடும் கரை அதுவரை.
உடலின் எல்லை எதுவரை?
சுடலையில் எரிந்தழி  யும்வரை.
நட்பின்  எல்லை எது வரை?- யாரும்
கண்டது இல்லை இதுவரை. 

பொய்யின் எல்லை எது வரை?
உண்மை வெளியில் வரும்வரை
வெய்யிலின் எல்லை எது வரை?
நிழல் தரும் தருவின் அடிவரை.
மையலின் எல்லை எது வரை?  
முப்பது நாள்முடி யும்வரை
நட்பின் எல்லை எது வரை? - யாரும்
கண்டது இல்லை இதுவரை. 

வித்தையின் எல்லை எது வரை - அதன் 
உத்திகள் வெளியில் வரும் வரை 
கத்தியின் எல்லை எது வரை? அதன்
கூர்முனை கேடயம் தொடும்வரை 
புத்தியின் எல்லை எது வரை ? இறுதி 
புத்தகப் பக்கம்  அதுவரை 
நட்பின்  எல்லை எது வரை?- யாரும்
கண்டது இல்லை இதுவரை.   

ஆண்டுகள் ஐம்பது முடிந்தபின்னே  நாம் 
மீண்டும் கூடுமின்   னாளினில் 
காளைப் பருவ நினைவுகளை நம் 
மூளையி லிருந்து மீட்டுவோம் .
சுகந்த மணத்தை பரப்பும் நிகழ்வுகளை  
பகிர்ந்து பேசியே  நெகிழுவோம் .  


பொன் புகழ் பதவி பொருளைத் தேடி 
ஓடி ஓய்ந்தவிவ்  வேளையில்  
கற்ற நாட்களில் பெற்ற நட்புகள் 
உறுதுணை என்ற  உணர்வுடன்
உறங்கிக்  கிடக்கும் நட்பு இழைகளை 
சேர்த்துக் கோர்த்துப் பின்னியே 
உறவுப் பாலம் ஒன்றை அமைத்து 
பிறவிப்  பயனை எய்துவோம் 

மார்கழிப் பிரசாதம்

இன்று மார்கழியின் கடைசி நாள்!

என் இள  வயது மார்கழி மாத நினைவுகள் இவை -

1. பசுஞ்சாணியில் பூசணிப் பூ செருகி வைத்து வாசலில் இடப்பட்டும் கோலம்.
2. அதிகாலையில் தெருவில் திருப்பாவை  பாடிச் செல்லும் பஜனை குழுக்கள்;
3. காலை ஐந்து  மணிக்கே  கோயில் விஜயம் .
4. இறைவனை வணங்கியபின் ஓடிச் சென்று வாங்கிச் சாப்பிடும்        நெய்ப்பொங்கல் பிரசாதம்!

சிறுவயதில், தீபாராதனை முடிந்தவுடன்,  முட்டி மோதி முன்னாலே  போய் நின்று , பொங்கல் பிரசாதம் வாங்கிச் சாப்பிட்ட அனுபவம் உங்களுக்கும் உண்டா?

இந்த பொங்கல் பிரசாதத்தைப்  பற்றி, மார்கழியின் கடைசி நாளன்று  ஒரு லிமெரிக் கவிதை !

அன்புடன் 

ரமேஷ் 


( ஒரு ஹிந்தி மொழிச் சொல்லோடு)

பனிவழியும்  மார்கழித் திங்கள்  
நெய்வழியும் பிரசாதப் பொங்கல் 
-------வரிசை  முறைகள் மீறி 
-------மற்றவர்   முதுகில் ஏறி 
வாங்குவதோ மிகப்பெரிய "டங்கல் " *  

"டங்கல் " =*डंगल ;(Dangal ) ; ஹிந்திச் சொல் ; பொருள் =  குஸ்திச்  சண்டை 

(வேற்று மொழிச் சொல் இல்லாமல்) 

பனிவழியும்  மார்கழித் திங்கள்  
நெய்வழியும் பிரசாதப் பொங்கல்
-------வரிசை  முறைகள் மீறி 
-------மற்றவர்   முதுகில் ஏறி 
வாங்குவதி  லென்னத டங்கல்?

பொங்கல் வாழ்த்து !

பொங்கல் வாழ்த்து !


திங்கள்  தையின் மங்கள முதல்நாள் 
பொங்கல் பானை பொங்கிய பின்னே
கங்குல்  மறைந்தால்  கங்கென உதித்து 
செங்கதிர் பரப்பும் ஞாயிறை நோக்கி  
பொங்கல் சோறை  படைத்து வணங்கி 
மங்களப்  பொங்கலை மகிழ்வுடன் போற்றும் 
இனிய இந்நாளில் உங்கட் கெல்லாம்  
மனம்நிறை பொங்கல் வாழ்த்துக்கள் அளிப்பேன்.

மனிதர், மாடுகள், நெற்கதிர் வயல்கள் 
இனிதே இவைகள் நலம்பெற வாழ்த்து. 
கருநாடகத்தில் கனமழை பொழிந்து 
காவிரி நிரம்பி ஓடிட வாழ்த்து.
திராவிட மக்கள் தடியடி இன்றி 
நீரைப் பகிர்ந்து வாழ்ந்திட வாழ்த்து.
ஏரைப் பிடிக்கும் உழவர் எல்லாம் 
டிராக்டர்* களுக்கு மாறிட வாழ்த்து                                       * Tractor 
"ஸ்மார்ட்போன்*    ஆப்"பால்  சந்தையில் நெல்லை       * smartphone app 
தாமே நேராய்  விற்றிட வாழ்த்து.

பொங்குக பொங்கல் ! பொங்குக பொங்கல் !
தங்குக எங்கும் பொங்கும் மங்களம்! 

மாங்காய் மஹாத்மியம்

மாங்காய் மஹாத்மியம் 

நேற்று இரவு, நான் இணைந்திருக்கும்  யாணர் கவிஞர்கள் வாட்ஸ்-அப் குழுவில் , மாங்காய்த் துண்டுகளோடு ஒரு கிண்ணத்தில்  உப்பு- மிளகாய்ப்பொடி வைத்து ஒரு படத்தைப் போட்டு,  அது பற்றி கவிதைகள் எழுதுமாறு ஒரு அழைப்பு வந்தது.

அதைக்  கண்டதும் பள்ளிப் பருவ நினைவுகள் நினைவில் கொப்பளித்தன!

வீட்டில் மாமரம் இருந்தாலும், மற்ற வீடு மாமரங்களிலிருந்து கல்லெறிந்து கீழே விழும் காய்களைக் கைப்பற்றி கடித்துண்ண நினைவுகள்--

வீட்டில் கூட்டமாய் அமர்ந்து கட்டித்  தயிர் சோறோடு வெட்டிய மாங்காயை சேர்த்து சாப்பிட்ட   நினைவுகள்---

பள்ளி வாசலிலும், கடற்கரையிலும்  தள்ளு வண்டியில் வைத்து , மிளகாய்ப் பொடியும் உப்பும் தூவி விற்கப்படும் நீளமான மாங்காய்  வில்லைகளை          ( ஒன்று மூன்று பைசா) வாங்கித் தின்ற  நினைவுகள் ---

 இப்படிப் பல நினைவுகள்.

அவற்றை பாடல்களாக வடித்திருக்கிறேன் .

பகிர்ந்துகொள்ளுவதில் மகிழ்ச்சி!

அன்புடன் 

ரமேஷ் 

வெட்டிவைத்த   மாங்காயின்  துண்டோடு வக்கணையாய்
தொட்டுண்ண உப்புமிள காய்ப்பொடி - பட்டவுடன்
அண்ணத்தில் ஊருமே எச்சில் அதனோடென்
எண்ணத்தில் ஊறும் நினைவு .
                                                                                              இரு விகற்ப நேரிசை வெண்பா 
XML

கட்டித் தயிரெடுத்து பச்சரிசிச் சோறினிலே
விட்டுப் பிசைந்து  அதனோடு தொட்டுக்க
மாங்காய்  மிளகுப் புடனுண்ணும் பேற்றினையே
வாங்கவும் உண்டோ விலை?  

                                                                                         பல விகற்ப இன்னிசை வெண்பா 

கல்லெறிந்து கீழ்விழுந்த மாங்கா
துண்டுதுண்டாய் அதைவெட்டி பாங்கா
-----மிளகாய்ப் பொடி தூவி
------உப்புத் தூள்  பாவி
வாயிலிட்டால் சுவையென்றும் நீங்கா!

                                                                                                                                                          (லிமெரிக் ) 

பிரதோஷப் பாடல் - 29

பிரதோஷப் பாடல் - 29

இன்றைய பிரதோஷப் பாடல்,  பிட்டுக்கு மண்சுமந்த பெருமானின் திருவிளையாடல் பற்றி!

சிவபெருமானின் திருப்பாதங்களில் சமர்ப்பணம்/

அன்புடன் 

ரமேஷ் 

கரைமீறி  பெருகிவரும் வைகை நதியின் 

          வேகத்தைத் வென்றேயோர்  அணை  கட்டிட 

நரைக்கூந்தல் கிழவியின் கூலி யாளாய் 

          அரன்வந்து அவள்சுட்ட புட்டை யுண்டு 

தரைமண்ணை தோண்டியணை கட்டும் வேலை 

          குறையாக முடிக்காமல் உறங்கும் வேளை 

பிரம்பாலே  பட்டவடி  அனைவர் மேலும் 

         விழுந்தே தழும்பான மாயம் என்னே !

எழுபது ஆண்டுகள்

நாளை மார்கழி மாதக் கிருத்திகை நாள். 
என்னுடைய எழுபதாம் பிறந்த நாள்! 

இந்த எழுபது ஆண்டு வாழ்க்கைப் பாதையில் என்னோடு இணைந்து பயணித்து எனக்கு உறுதுணையாக விளங்கிய   என் குடும்பத்தினருக்கும் , உறவினர்களுக்கும், நண்பர்களுக்கும்  என் மனமார்ந்த நன்றிகள் ! 

அன்புடன்
ரமேஷ்

எழுபது ஆண்டுகள்

எழுபது ஆண்டுகள் இப்புவி யுலகில்
முழுவதும் வாழ்ந்து  முடிக்கும் இந்நாளில்
அழகிய வாழ்வை அளித்த இறைவனை
தொழுது வணங்கித் தொடர்வேன் வாழ்வை.

அழுகுரல் ஒலிக்க இத்தரை மேலே
விழுந்த என்னைத்  தழுவி எடுத்து
அணைத்து வளர்த்து அறுசுவை ஊட்டி
அனைத்திலும் சிறக்க நல்வழி காட்டி
           வளர்த்த அன்னை தந்தை யருக்கும்

தெள்ளிய தமிழ்மொழிப் பாடத் துடனே
வெள்ளையர் மொழியும் விஞ்ஞா னங்களும்
எண்கணி தங்கள் அறிவியல் பொறியியல்
எனப்பல துறையிலென்   அறிவை வளர்த்த
          ஆசிரி யப்பெருந் தகையர் களுக்கும்

நாற்பத் திரண்டு ஆண்டா யென்கை
கோர்த்து நடக்கும் இனியவென்  மனையாள்
தன்சுகம் தன்னலம் என்றும் நினையாள்
என்னலம்  மட்டும் நினைத்திடும் இணையாள்
          இத்தகு வாழ்க்கைத் துணையா ளுக்கும்

இவனின் தந்தை என்னே என்று
அவையோர் அனைவரும்  புகழும் வகையில்
செய்கா ரியங்கள் சிறப்புறச் செய்தும்
பெயர்த்திகள் மூவரைப் பரிசாய் அளித்தும்
வேர்கள் களைத்துநான் சோர்ந்திடும் போது
விழுதாய் ஊன்றி என்னைத் தாங்கும்
          இருமகன் கட்கும்  அவர்தம் துணைக்கும்

பெற்றோர் வழியில் வந்த உறவுகள், (நான்)
பெற்றவர் மூலம் உற்ற உறவுகள்
முந்திப்  பிறந்த மூத்த உறவுகள்     
பிந்திப் பிறந்த இளையோர் என்று
           பரந்து விரிந்தவென்  குடும்பத்  தார்க்கும்

பள்ளியில் என்னுடன் கூடப் படித்தோர்
கல்லூ ரிகளில் கூடப் பயின்றோர்
அலுவல கங்களின் சகபணி யாளர்
புலவர் குழுவில் பாடல் புனைவோர்
எனப்பல தளங்களில் என்னோ டிணைந்து
மனமிக மகிழ்வுடன் துணையாய் நின்றென்
          நலனை வேண்டும் நண்பர் பலர்க்கும்
         

இந்நாள் வரையில் என்னுடன் இருந்து
என்குணக் குறைகள் யாவையும் பொறுத்து
அன்பைப் பொழிந்த அத்தனை பேர்க்கும்
என்னெனக் கூறி நன்றி நவில்வேன்?
          என்னெனக் கூறி நன்றி நவில்வேன்?

பின்வரும் எஞ்சிய காலம் முழுதும்
என்றும் இதுபோல் ஒருவரோ  டொருவர்
குன்றா அன்புடன் கூடி இருக்க
குன்றுறை குமரன் கருணை புரிக !