அயோத்யா

நேற்று அயோத்தியாவில் நடைபெற்ற பூமி பூஜையை ஒட்டி இரு சிறு பாடல்கள்.

அன்புடன் 

ரமேஷ்  

அயோத்யா 

பாடல் 1

புதையுண்டு பூமியிலே பலகாலம் கிடந்தாலும் 

கதையாய்க் காவியமாய் பக்தர்கள் மனதினிலே 

வதையுண்டு போகாமல் விதையாய் உயிர்வாழ்ந்து 

சிதையாமல் சிதறாமல் விருட்சமாய் வளருதிங்கு !

பாடல் 2

இலக்குமியின் மலர்க்கரம் பற்றி அவள் இடப்புறம்.
இளையநம்பி இலக்குவன் இருப்பதவன்  வலப்புறம். 
இலக்கென்றும்   இழக்காத கோதண்டம் தோளிலே. 
இலங்கையை எரித்திட்ட  அனுமந்தன் தாளிலே. 
வலக்கையை உயர்த்தியே   வரங்கள் வழங்குவான் !
கலக்கங்கள் விலக்கிடும் ஸ்ரீராமன் தரிசனம். 

பிரதோஷப் பாடல் -35

பிரதோஷப் பாடல் -35

இன்றைய பிரதோஷப் பாடல் சிவபெருமானின் அறுபத்திநான்கு  திருவிளையாடல்களில் ஒன்று. 

வரகுண பாண்டியனின் பிரம்மஹத்தி தோஷத்தை திருவிடைமருதூர்த் தலத்தில் இறைவன் போக்கியது பற்றியும், பின்பு அவனுக்கு சிவலோக தரிசனம் தந்து அருளியதைப் பற்றியும் இந்தப் பாடலில் கூறியுள்ளேன்.

அன்புடன் 

ரமேஷ் 

வரகுணனுக்கு சிவலோகம் காட்டிய படலம் 

அறியாம லேயோர் அந்தணனைக் கொன்றதால் 
--------- பிடித்ததோர்  தோஷத் தினை  
சரிசெய்யும் வழிகாட்டி வரகுண வழுதிக்கு 
----------திருவிடை மருதூர்த் தலப் 
புரியிலே அருள்செய்து சிவலோக தரிசனம் 
----------காட்டியே மீட்டுவந் தான். 
திரிபுர மெரித்தவன் விரிசடை வேதியன் 
----------திருவிளை யாடலிது வாம்   

பாடற்பொருள் :

வரகுணபாண்டியன் காட்டில் வேட்டையாடித் திரும்புகையில் அறியாமல் அவனது குதிரையின் காலில் மிதிபட்டு ஓர் அந்தணன்  இறந்ததால் அவனை பிரம்மஹத்தி தோஷம் பீடித்தது. அந்த தோஷம் இறைவனருளால்   திருவிடைமருதூர்த் தலத்தில் வழிபட்டதும் விலகியது. அதன்பின், சிவலோக தரிசனம் செய்ய விரும்பி வேண்டிய  பாண்டியனுக்கு, இறைவன் அவ்வாறே அத்தரிசனம் கிடைக்குமாறு  அருளினான். 

The story in English :

Varaguna pandian , the Pandiya King, was returning after a hunting trip. At that time, his horse unknowingly trod on a Brahmin who was lying down by the road side and the Brahmin lost his life. Unaware of this the King returned to his palace.  Because of this the King became afflicted with Brahmahaththi dosham (curse). The next day, when the King came to know of this, he was stricken with sorrow.  He donated lot of wealth to the relatives of the deceased and also performed various religious rites as enjoined in the scriptures. But still the curse could not be neutralised and the King was subjected to mental torture. As advised by the learned elders, he went around the temple of Lord Somasekarar  a thousand times for ten days. Upon completion,  he was accosted by a celestial voice which said "Soon there will be a battle between you and the Chola King during the course of which you will defeat and chase the Chola King  and will reach Thiruvidaimaruthoor. There you will have the Darshan of the deity and your curse  will leave you". The events unfolded as described by the celestial voice. Varagunapandian chased the Cholan and reached Thiruvidaimaruthoor and entered the temple through the eastern gate. The Brahmahaththi could not enter the holy site and was left standing outside the gate. The Lord blessed the King and advised him to leave the temple through the western gate, leaving the Brahmahaththi waiting at the eastern gate! The King did as he was told and got cured of the curse. Later he felt an urge to have the darshan of the Lord at His celestial seat. The Lord granted his wish by bringing the Sivalokam down to Madurai  briefly and enabled the King to have a blissful Darshan of the celestial abode of Shiva!

The story in Tamil: 

மதுரையை ஆண்டு வந்த வரகுண பாண்டியன் வேட்டையாடியபின் காட்டிலிருந்து திரும்பும்போது, அவனறியாமல் அவனது குதிரை வழியில் படுத்து உறங்கிக்கொண்டிருந்த ஒரு அந்தணன் மீது ஏறி, அவன் உயிரிழக்க நேர்ந்தது. இது அவன் அறியாமல் நடந்ததெனினும், அரசனை ப்ரம்மஹத்தி தோஷம் வந்தடைந்தது. இறந்தவர் குடும்பத்திற்கு வேண்டிய பொருளுதவிகள் செய்தும், முறைப்படி செய்யவேண்டிய பரிகாரங்களை செய்தும் அந்த தோஷம் நீங்காது அவனை வாட்டியது. அறிஞர்கள் உரைப்படி, மன்னன் சோமசேகரர் திருக்கோவிலை தினமும் ஆயிரம் முறை வலம் வந்தான். பத்து நாட்கள் வலம் வந்தபின், வானிலிருந்து ஒரூ குரல்  " பாண்டியனே! இன்னும் சிலநாட்களில், சோழ மன்னன் உன்னோடு போர் தொடுப்பான். அவன் போரில் தோற்று ஓடுகையில் நீ அவனைத் துரத்தி திருவிடைமருதூர்த்தலம் வருவாய். அங்கு எம்மைத் தரிசனம் செய்தபின் உன் தோஷம் விலகும்" என ஒலித்தது!அவ்வாறே சில நாட்களுக்குப் பின் சோழன் மதுரை மீது போர் தொடுக்க, பாண்டியனும்  அப்போரில் சோழனை வென்று அவனைத் துரத்தி மருதூர்த் தலம் அடைந்து, கோவிலின் கிழக்கு வாசல் வழியே உள்ளே நுழைந்தான். அவன் கோயிலின் உள்ளே  நுழைகையில் அவனைப் பிடித்திருந்த ப்ரம்மஹத்தி அந்தப் புண்ணியத்தலத்தினுள் நுழைய முடியாமல் வெளியிலேயே நின்றது! பாண்டியன் இறைவனை வணங்க, தோஷம் நீங்கஅருள் செய்த இறைவனும் பாண்டியனை கோவிவிலின் மேற்கு வாசல் வழியே வெளியேறப் பணித்தான். பாண்டியனும் அவ்வாறே செய்து ப்ரம்மஹத்தி தோஷம் விலகப் பெற்றான். பின்பொரு சமயம். வரகுணபாண்டியன் சிவலோகத்தில் பெருமான் வீற்றிருக்கும் காட்சியைக்  காண விழைந்து அவரை வேண்ட, சிவபெருமானும் சிவலோகத்தை  மதுரையம்பதிக்கே வரவழைத்து, மன்னன் கண்குளிர தரிசிக்கச் செய்தான்.

(கொரானா) வலையில் சிக்கிய மீன்கள்

(கொரானா) வலையில் சிக்கிய மீன்கள் 

செய்தி :

காசிமேடு மீன் சந்தையில் இன்று கட்டுக்கடங்காத கூட்டம்!
சமூக இடைவெளி விதிமுறைகளைக் காற்றில் பறக்கவிட்ட மக்கள்!

பாடல் :

மீன்வாங்கச் சந்தைக்குச் சென்றோர் கொரானாவைத்
தான்வாங்கி வந்தார் திரும்புகையில்   - ஏன்தானோ
மின்விளக்கின் மேல்விழுந்து மாய்கின்ற விட்டில்போல்
தன்னையே   தண்டிக்கின்  றார்?

(இருவிகற்ப நேரிசை வெண்பா)


அன்புடன்

ரமேஷ்

மனதின் கழிவுகள்

நம் உடலின் அவயவங்கள்,நாம் சுவாசிக்கும் காற்றிலும், உண்ணும் உணவிலும் உள்ள சத்தை  மட்டும் எடுத்துக்கொண்டு கழிவை வெளியேற்றிவிடுவது போல், நம் மனமும் நல்ல எண்ணங்களை மட்டும் வைத்துக்கொண்டு , கெட்ட எண்ணங்களை எல்லாம் விலக்கிவிட்டால்  எவ்வளவு நன்றாக இருக்கும்!
ஏன் இறைவன் அப்படிச் செய்யவில்லை?

அன்புடன் 

ரமேஷ் 


உள்ளி ழுக்கும் காற்றி லும் 
-----உண்ணு கின்ற உணவிலும்
உள்ள நல்ல சத்தையே 
-----மட்டு மேற்று கழிவினை
தள்ளு கின்ற வித்தையை 
-----உடலின் உள்ளே  வைத்தவன்,
உள்ளம் என்னும் ஊற்றிலே 
-----கொப் பளித் தெழுந்திடும்
கள்ள எண்ணக் களைகளை 
-----களைந் தெடுத் தெறிந்துபின்
நல்ல எண்ணம் மட்டுமே 
-----நிலைத்து நிற்க வைத்திடும்
வல்லிய தோர் சக்தியை 
-----உள்ளிருத்த  விடுத்த தேன்? 

உண்மை பொய்மை  இடையிலும் 
-----நன்மை தீமை இடையிலும்
உண்டு செய்து சண்டையை  
-----கண்டு  அதனை ரசிக்கவோ?

நுண்மை யாக எண்ணினால்  
-----என்ன வென்று தெரிந்திடும் ;
எண்  குணத்தான் எண்ணமும்
-----நன்கு நமக்குப்  புரிந்திடும்.

உடலம்  எனும்  பருப்பொருள் 
-----தனிற் படியு மழுக்கினை 
துடைக்க  உதவும் கருவிகள் 
-----தந்த அந்த ஆண்டவன்
உள்ளம் எனும் கருப்பொருள் 
----மேற்  படர்ந்த மாசினை 
விலக்க வேண்டும்  வழிகளை 
-----உனையே  தேடச் சொல்கிறான்!

இலையுதிர் காலங்கள்

இலையுதிர் காலங்கள் 

மரம்விடுத்து மிதந்துவிழும் பழுப்புவண்ண  இலைகளே 

மனம்விடுத்து மிதந்துசெல்லும் எண்ணஅலைகள் போலவோ?

எண்ணஅலைகள் எழுதும்கவிதைக்  கருப்பொருளாய் ஆகும்போல்

மண்விழுந்த இலைகளுமே நல்லுரமாய் மாறுமே !

கடந்துபோன   கோடைகாலக்  கதிரவனின் கிரணங்களால்

சூடுபட்ட உடலின்வெப்பம் சற்றுக்குறைய வேண்டியே

ஆடையான இலைகளைந்து  அத்தனை  மரங்களும்

வாடைக்கால வருகைக்காக விழிகள்நோக்கி  நிற்குதோ?  

நேற்றுமாலை இலைகள்நிறைந்த கூந்தல்இருந்த  மரங்களே

முற்றும்இன்று ஓரிரவில் மொத்தமுடியும் இழந்ததே!

இன்றுமனிதன் அனுபவிக்கும் இன்பம்செல்வம் அனைத்துமே

நின்றுஎன்றும் நிலைப்பதல்ல என்றஉண்மை உணர்த்துதோ?

இலையைஇழந்து கிளைகள்வெறித்துக் காத்துநிற்கும் மரங்களும்

நாளைவசந்த வேளைவந்தால் மீண்டும்பூத்துக் குலுங்குமே !

நிலையும்இன்று குலைந்துபோன மனிதர்பலரின்  வாழ்வுமே

மலர்ந்துமீண்டும் மகிழ்ச்சிகூடும் ; இதுவும்வாழ்க்கைப் பாடமே! 

அந்த ஏழாம் நாள்

அந்த ஏழாம் நாள்

இன்று ஞாயிற்றுக்கிழமை!
பணியிலிருந்து விடுதலை பெற்று பல ஆண்டுகள் ஆகிவிட்டன.
அதனால் நடைமுறையில் ஒவ்வொரு கிழமைக்கும்  பெரிதாக வித்தியாசம் தெரிவதில்லை.
பேரன்,பேத்திகளுக்கு பள்ளி விடுமுறை என்பதாலும், மகன்களுக்கு அலுவலக விடுப்பு நாள் என்பதாலும் மட்டுமே ஞாயிற்றுக்கிழமை என்று தெரிய வந்திருந்தது.
இப்போது, இந்த கோவிட்  நாட்களில் அந்த வேறுபாடு கூட  இல்லை.
என்றாலும் திங்கள் முதல் சனிக்கிழமை வரை காலை ஆறு மணிக்குள் என் தூக்கம் கலைந்துவிடுகிறது!
ஞாயிறன்று மட்டும் அது நடப்பதில்லை.
இந்த நாட்களின் வேறுபாட்டை உடலும் மனமும் துல்லியமாக அறிந்து கொள்ளுகின்றனவே!
உங்களுக்கும் அப்படித்தானா?

அன்புடன் 

ரமேஷ் 

அந்த ஏழாம் நாள்

வேலையினை நான்விடுத்து ஆண்டு பல ஆனாலும்
நூலைப் பிடிப்பதுபோல் ஐந்திலிருந்து ஆறுக்குள்
ஆலையின் சங்கொலிபோல் உள்ளிருந்தோர்  ஒலியெழுப்ப
காலைக் கண்விழித்தல் தானாக நடக்கிறது

வாரத்தின் முதலாறு நாட்களில் மட்டிலுமே 
நேரம் தவறாமல்  நிதம்நடக்கும் நிகழ்விதுவே
ஏழாம்  நாள்மட்டும் என்றுமே நடப்பதில்லை
பாழும் மூளைக்கு ஏனிதெனப்  புரிவதில்லை.

நாடு முழுவதுமே பூட்டி இருக்கையிலும்
வீடே கதியென்று விழுந்து  கிடக்கையிலும்
முதலாறு  நாளினின்  றதைத்தொடரும்  ஞாயிறையே
விதம்பிரித்து அறிகிறதே என்மனமிது எங்கனமோ?

ஒற்றைச் செருப்பு - 2

ஒத்தைச் செருப்பு - 2


காலையில் நடந்து  செல்கையில் கண்டேன்   
சாலையில் கிடந்ததோர் ஒற்றைச் செருப்பை .
ஜோடி யாகவே வாழ்ந்த  செருப்புகள் 
மோடி செய்துஏன் பிரிந்து போயின?

கடைசிப் பஸ்ஸை  ஓடிப் பிடிக்கையில் 
கழண்டு விழுந்து 'கால்விடப்' பட்டதோ? 
காலைக் கடித்த காரணத் தாலே 
கோபப்  பட்டு எறிந்துவிட் டாரோ? 

கள்ளுக் கடையில் நேற்றைய இரவு 
"புல்லாய்த்"* தண்ணீர் போட்டு விட்டு    (* full-ஆய்) 
தள்ளாடித்  தடு மாறி நடந்த 
குடிமகன் விடுத்த காலணியோ  இது?

ஒரு காலணியை இழந்த வருக்கு 
மற்றொன் றால்உறும்  பயனும்  உண்டோ?
தெருமுனை மட்டும் நடந்து பார்த்தால் 
அந்தச் செருப்பும் அங்கே கிடைக்குமோ?