பிரதோஷப் பாடல் - 10 Pradosham Song 10

பிரதோஷப் பாடல் - 10

இன்று பிரதோஷம்.

இன்றைய பிரதோஷப் பாடல்  கைலாய மலையைத் தூக்க முயன்று தோல்வியுற்ற  ராவணன் தன்  தவறை உணர்ந்து அரனை வேண்டிப் பிழைத்த கதையைப்  பற்றியது.

இராவணன் சிறந்த சிவபக்தன்.

ஒரு சமயம், குபேரனைப் போரில் வென்ற பின் , வான்வீதி வழியாக ராவணன் திரும்புகையில் நந்தி அவன் வழியைத் தடை செய்தார். 

"இது சிவபெருமான் குடியிருக்கும் கைலாயம். இதைக் கடந்து செல்லல் இயலாது. சுற்றியே செல்லவேண்டும்" என்று அவர் கூறியதை ஏற்காமல் 

தலைக் கனம் மிகுந்ததால், " அந்த சிவன் குடியிருக்கும்  மலையையே இவ்விடத்திலிருந்து பெயர்த்து விடுகிறேன் " என்று அதைத்  தூக்க முயன்றான். இதை உணர்ந்த சிவபெருமான் தன் விரலால் மலையை அழுத்த,  அதன் அடியில் சிக்கித் தவித்தான் ராவணன். தன்  தவறை உணர்ந்து, தன் ஒரு தலையைக் கொய்து, அதனோடு தன்  உடலின் நரம்புகளை எடுத்து வீணையாகச் செய்து மீட்டி, சிவனைத் துதித்தான்.

மகிழ்ந்த சிவபெருமானும் அவனை விடுவித்து அருள் செய்தார்.

இந்த நிகழ்ச்சியை விளக்கும் ஒரு பாடல் இன்றைய பிரதோஷத்தில்.

அன்புடன் 

ரமேஷ் 

பிரதோஷப் பாடல் - 10

கயிலாய மலையைத்தன் கைகளா லேயசைக்க
இயலாமல் இடுக்குற்ற ராவணனும்- தயங்காமல்
நரம்பெடுத்து  நாண்பூட்டி  நல்வீணைக் கீதத்தால்
அரன்புகழ்  பாடியுய்த் தான் 
                                                                 ( வெண்கலிப்பா )

வலிகள்

வலிகள் 

வயதாகிவிட்ட தாத்தாவிற்கு 
முதுகுத் தண்டின்  L -4 L -5  ஜாயிண்ட்-இல்   ப்ரொலாப்ஸ்*  (Prolapse)

ஒன்றரை வயதுப் பேத்தியைத் தூக்கிக் கொஞ்சினால் 

முதுகு வலிக்கிறது.

தூக்க முடியாமல் போனதால்

மனது வலிக்கிறது!----------------------


அன்புடன் 

ரமேஷ் 

குறள் மேல்வைப்பு வெண்பா -19

குறள் மேல்வைப்பு வெண்பா -19

துரியோதனன் தர்மனை சூதாட அழைக்கிறான். தர்மனும் அதற்கு ஒப்புக்கொள்கிறான்.  துரியோதனன் எத்தனை மூர்க்கனாக இருந்தாலும் அவனது குறைகளையும், நிறைகளையும் அவனே உணர்ந்திருந்த காரணத்தால் , சூது விளையாட தன்னைவிட அவன் மாமனான சகுனியே  சிறந்தவன் என்று முடிவு செய்து ஆட்டம் ஆரம்பிக்கும் முன்  தனக்குப் பதிலாக சகுனியை நியமிக்கிறான்.

அதேபோல், தருமனும், பாண்டவர்களுக்கு எல்லா விதத்திலும் உதவியாக இருக்கும் கண்ணனை தனக்குப் பதிலாக நியமித்திருக்கலாம்! ஆனால் அவ்வாறு செய்யாமல், தானே ஆடுகிறான்.

முடிவு  என்ன ஆனது என்பது நம் அனைவருக்கும் தெரிந்ததே!

சூதாட சகுனியே  சிறந்தவன் என்று அவனை நியமித்ததால் , துரியோதனன் வென்றான்.

இதைத்தான் வள்ளுவரும் தனது குறட்பாவில்  ( அதிகாரம் - தெரிந்து வினையாடல் - குறள்  எண்  517 ) கூறுகிறார்.

குறள் :

இதனை இதனால் இவன்முடிக்கு மென்றாய்ந்

ததனை அவன்கண் விடல்.

இதன் பொருள் 

ஒரு  காரியத்தை செவ்வனே செய்யக்கூடியவன் எவன் என்பதை ஆராய்ந்தறிந்து, இக்காரியத்தை அவனைச் செய்ய விடுவைத்தே வெற்றிக்கு வழி.

இதற்க்கு எடுத்துக்காட்டாக விளங்கும் தருமன் - சகுனி சூதாட்டக் கதையை முதல் இரண்டு அடிகளிலும், இந்தக் கருத்தை விளக்கும் குறளை பின்னிரண்டு அடிகளிலும் கொண்ட மேல்வைப்பு வெண்பா கீழே!

அன்புடன் 

ரமேஷ் 



துரியனோ சூதாட மாமனைத்  தேர்ந்தான் 
தருமனோ தானாடிக்  கெட்டான்  -  அறிவாய்  
இதனை இதனால் இவன்முடிக்கு மென்றாய்ந்
ததனை அவன்கண் விடல்.
                                                                    (பல விகற்ப இன்னிசை வெண்பா )

The English poetic version by Rev. Pope :

"This man, This work will thus work out" let thoughtful king command
Then leave the matter wholly in his servant's hand.

The English poetic version by Suththaananda Barathiyaar 

This work, by this, this man can do 

Like this entrust the duty due.

Meaning 

After having considered " this man can accomplish this, by these means ", let the King leave him in the discharge of his duties.

The story in English :

Duryodana, the head of the Gowravas, challenged Dharman, the head of the Pandavas, for a game of dice. Dharman accepts the challenge. Duryodhanan, knowing fully well that his uncle Sakuni, a master of the dice game, is the best man to represent him and win the game, deputes him to play on his behalf. Likewise Dharman, who was not very proficient in the game, could have deputed his cousin Krishna, a staunch supporter of the Pandavas to play the game on his behalf. But he did not do that. The result is known to all of us. Duryodanan succeeded because he choose the right person and entrusted him to do the job!

ஜன்மாஷ்டமி-

ஜன்மாஷ்டமி - கிருஷ்ணன் பிறப்பின் உட்பொருளும் அது தரும் சேதியும்

ஜன்மாஷ்டமி - கிருஷ்ணன் பிறப்பின் உட்பொருளும் அது தரும் சேதியும்

கிருஷ்ணன் பிறந்தவுடன் , நந்தகோபன் அடைக்கப்பட்டு இருந்த சிறைக்  கதவு  தானாகத்  திறந்தது ! அவரைப்  பிணைத்து இருந்த தளைகள் அறுந்தன ! 

அது போல, மனதில் ஞானம் பிறக்கும்போது , மனிதரைப்  பிணைத்திருக்கும் துர்க்குணங்கள் உடையும்  !  வேற்றுமைகளை ஒழித்து மனக் கதவுகள் திறக்கும் . 
இதுவே ஜன்மாஷ்டமி நிகழ்வின் உட்கருத்தோ ?

அன்புடன் 

ரமேஷ் 



நிசிநேர  நள்ளிரவில் பூட்டிவைத்த பாழ்சிறையில்  
நீபிறந்த நேரத்தில் சிறைக்கதவும் தாள் திறக்க  
வசுதேவன் காலிருந்த விலங்குகளும் விலகிடவே  
சிசுவுன்னைத் தோள்சுமந்து செல்கையிலே யமுனையுமே 
வகிடெடுத்து வழிவிடுக்க வல்லரவும் குடைபிடிக்க 
விசுவாதி தேவர்களும் வணங்கியுனை வாழ்த்துரைக்க 
பசுமேய்ந்து பால்சுரக்கும் கோகுலத்தை சென்றடைந்து 
யசுஓதை ஈன்றெடுத்த மகனாக வளர்ந்திட்டாய். 

அதுபோல   

மாசுற்ற வாசனைகள் மிகப்படிந்த மனச்சிறையில்  
இருள்விலகி ஞானஒளி பிறக்கின்ற நேரத்தில்  
பாசம் அகங்காரம் ஆணவங்கள் தன்முனைப்பு  
போன்ற விலங்கெல்லாம்  தெறித்துடைந்து   போய்விடுமே! 
தேசங்கள் மதமினங்கள் தோல்நிறங்கள் என்றணிந்த  
வேஷங்கள் விட்டொழித்து மனக்கதவும் திறந்திடுமே!
நிசமான இஞ்ஞானம் உடைத்தாயின் எல்லோர்க்கும் 
வசமாகும் வைகுண்டம்கண்ணனவன் அருளாலே!

பிரதோஷப் பாடல்-9 Pradosham song-9

பிரதோஷப் பாடல் - 9

பிரதோஷப்  பாடல்

பிரம்ம தேவனின் புதல்வர்களும், முனிவர்களுமான சனகன், சனாதனன் , சநந்தனன், சனத்குமாரர் என்ற நால்வரும் , பல நூல்கள் கற்றபின்னும் , பெருந்த்தவங்கள் புரிந்த பின்னும்  உண்மையை உணரமுடியாத நிலையில், ஆலமரத்தடியில் மோனத்திருக்கோலத்தில் வீற்றிருக்கும் தக்ஷிணாமூர்த்தியைப் பணிந்து வேண்டினர். வாய்மொழிகளுக்கு ஏதும் வேலையில்லாமலே ,  அவர்களது ஞானக்  கண்ணைத் திறந்தான் சிவபெருமான்.

இது பற்றி, ஒரு பாடல் ,  இன்றையப்  பிரதோஷத்தன்று.

அன்புடன் 

ரமேஷ் 

சனகன் சனாதனன் சனந்தனன் சனத்குமரன் 
எனும்நான்கு  நான்முகன் பெற்ற  முனிவர்க்கு  
மோனக்  கோலத்தில் ஆலின் அடியமர்ந்து 
ஞான ஒளிதந்த  நாயக னைப்பணிவாம்

Sanakan, Sanandanan, sanaadanan and sanathkumaaran were four sons of Brahma. These sages, even after involved studies were unable to realise the Supreme Truth. They came to Lord Shiva, who was seated under the Banyan Tree in the Yoga pose and prayed and medidated before  him. Even without uttering a single word, the Lord brought true realaisation to those sages, showing that the Ultimate Truth can not be explained in words but has to be experienced.

அடி - உதை - குத்து- கொல்லு- புதிய தேசிய கீதம்?

"அடி - உதை - குத்து- கொல்லு"-  
இதுதானா நம் புதிய தேசிய கீதம்?

இன்று நம்முடைய நாடு சுதந்திரம் பெற்று 71 ஆண்டுகள் ஆகிவிட்டன.

பல துறைகளிலும் நாம் முன்னேற்றம் அடைந்திருக்கிறோம். இதை மறுப்பதற்கில்லை. 

இன்று நாம் மகிழ்வுடன் அந்த முன்னேற்றங்களை எண்ணிப் பார்த்து மகிழ வேண்டிய நேரம். 

என்றாலும், சில நாட்களாக மக்களுடைய எண்ணத்திலும், நடத்தையிலும் ஒரு வருந்தத்தக்க மாறுதல் நிகழ்ந்து கொண்டிருக்கிறது   என்று அஞ்சுகிறேன்! 

சிறு சிறு காரணங்களுக்காகவும் , வதந்திகளை நம்பியும், கூட்டமாக வன்முறையில் ஈடுபடும் நிகழ்வுகள் நாளுக்கு நாள் அதிகரித்துக் கொண்டே போகின்றன. 

பிள்ளை பிடிக்கிறார்கள் என்ற வதந்தி, கல்லூரிக்குச் செல்லும் பேருந்தைக் கடத்தி  வன்முறை, ( இது சென்னைக்கே உரியது), பசுவைக் கொள்கிறார்கள் என்ற வதந்தி, கலப்புத் திருமணம் -- இவ்வாறு வெவ்வேறு காரணங்களுக்காக. சட்டத்தை தன கையில் எடுத்துக்கொண்டு,  கூட்டம் கூட்டமாக வன்முறைகளில் ஈடுபடும் நிகழ்வுகளைப்  பற்றி , மனம் வருந்தி இனியும் இத்தகைய நிகழ்வுகள் நடக்காத்திருக்க வேண்டி, இந்த சுதந்திர தினத்தன்று ஒரு பாடல். 

அன்புடன் 

ரமேஷ்

"அடி - உதை - குத்து- கொல்லு"- 
இதுதாநம் னா  புதிய தேசிய கீதம்?


செய்தி
வெளியூருக் கூட்டம்ஒண்ணு
நம்மூருக் குள்ளவந்து
பிள்ளை பிடிக்குதுன்னு
வாட்சப் நியூசு .
கூட்டம்
பஞ்சாயத்து பார்க்கருகே
தமிழ்தெரியா பெண்ணொருத்தி
பள்ளிப் பசங்களுக்கு
மிட்டாய் தராளாம்.
விடாதே நீ , அவளப் பிடி
கட்டிப்போட்டு  தோலைஉரி .
அடி - உதை - குத்து- கொல்லு
அடி - உதை - குத்து- கொல்லு

பொதுமக்கள் 

------இதுதானா நாம் பெற்ற

-------புதிய சுதந்திரம்?

-------இதுதானா நம் புதிய

-------தேசிய கீதம்?

செய்தி 

விடுமுறையும் முடிஞ்சாச்சு
கல்லூரி  திறந்தாச்சு
பஸ்நாளை கொண்டாடும்
நேரம் வந்தாச்சு
கூட்டம்
ரூட்டுதலை தலைமையிலே
பேருந்தை கடத்துவோம்.
பொதுமக்கள் போலீசு
தடைசெஞ்சா மிரட்டுவோம்.
கல்லெறிவோம் சில்லுடைப்போம்
பேருந்தில்  தீயிடுவோம்
அடி - உதை - குத்து- கொல்லு
அடி - உதை - குத்து- கொல்லு

பொதுமக்கள்
------இதுதானா நாம் பெற்ற

-------புதிய சுதந்திரம்?

-------இதுதானா நம் புதிய

-------தேசிய கீதம்?

செய்தி 

வீதியிலே பசுமாட்டை  

ஒட்டிக்கிட்டு போரவங்க 

பசுவைக்கொல்லப் போறாங்கன்னு

சேதி சொன்னாங்க.

கூட்டம்

சொன்னசேதி சரிதானா 

இல்லவெறும் பொய்தானா 

நின்னுபேச நேரமில்லை 

கொன்னுபசுவை போடுமுன்னே 

ஓடிப்போயி ஆளைப்பிடி 

உருட்டிமிரட்டி விரட்டிஅடி
அடி - உதை - குத்து- கொல்லு
அடி - உதை - குத்து- கொல்லு

பொதுமக்கள் 

------இதுதானா நாம் பெற்ற

-------புதிய சுதந்திரம்?

-------இதுதானா நம் புதிய

-------தேசிய கீதம்?

-
செய்தி
மேல்ஜாதி பெண்பிள்ளை
கீழ்ஜாதி பையனையே
காதலித்து கைப்பிடித்து
ஓடிப் போனாளாம்
கூட்டம்
வீதியிலே நடக்கையிலே
சாதிசனம் சிரிக்கிறது! !
ஓடிப்போன ஜோடிகளை
தேடிப்பிடித்து கட்டிவிடு .
தோலை உரித்துவிடு
காலனியைக்   கொளுத்திவிடு
அடி - உதை - குத்து- கொல்லு
அடி - உதை - குத்து- கொல்லு

பொதுமக்கள்
------இதுதானா நாம் பெற்ற

-------புதிய சுதந்திரம்?

-------இதுதானா நம் புதிய

-------தேசிய கீதம்?

     

ரசவாதம்

நகர மறுக்கும் நிமிடங்களும் நாட்களும் எப்படி நிகழ்வதென்றே தெரியாமல் மாதங்களாகவும், வருஷங்களாகவும் மாறிவிடுகின்றனவே! இந்த ரசவாத விந்தையை நீங்களும் உணர்ந்திருக்கிறீர்களா? 

அன்புடன் 

ரமேஷ் 

ரசவாதம் 

காலையில் விழிக்கும்போதே கனத்த மனத்துடன் எழுகின்றேன்!

இன்னொரு நாளைக் கடக்க வேண்டுமே என்ற சோர்வோடும்,
எப்படிக் கடக்கப்போகிறேன் என்ற கலக்கத்தோடும் !

நேற்றுச் செய்யத் தவறிய கடமைகள்
கழுத்தில் கட்டிய கல்போல் சுமக்கின்றன.

செய்தாகவேண்டும் என்ற புரிதலுக்கும்
செய்யாதே எனத்தூண்டும்
மனத்தின் மறுதலிப்புக்கும்
இடையே நடக்கும் போராட்டமாக
நாள் ஊர்ந்து நகர்கிறது.

நிமிடங்களாக நீளத் தயங்கும்  நொடிகளையும் 

மணிகளாய் மாற  மறுக்கும் நிமிடங்களையும்  

எப்படியோ தாண்டி 

ஓரு  நாளைக் கடந்து 

மீண்டும் இரவில் போர்வைக்குள் புகுந்துகொள்கிறேன்.

ஒவ்வொருநாளும் இப்படி நகர மறுக்கின்றபோதும், 

நாட்கள் வாரங்களாகவும் 

வாரங்கள் மாதங்களாகவும் 

வியப்புக்குரிய வேகத்துடன் விரைகின்றனவே!

திடீரென்று ஒரு நாள்
நாள்காட்டியைப் பார்க்கையில் 

ஒரு வாரமோ, ஒரு மாதமோ கழிந்துவிட்டிருக்கிறதே!

இது என்ன ரசவாதம்?