இராம நவமிப் பாடல்
இன்று ராமநவமி ! ராமபிரானின் அருள் வேண்டி ஒரு பாடல்
அன்புடன்
ரமேஷ்
கானகம் சென்றுதன் தந்தைசொல் காத்தானை,
வானரச் சேனைகளின் துணையோடு சமர்செய்து
தானவரைக்* கொன்றழித்து தருமத்தை நிலைநாட்டி *தானவர்=அரக்கர்
சானகனின்* திருமகளை சிறைமீட்டு வந்தானை, * சனகன்
வானகத் துறைதேவர் வணங்கித் தொழுவானை,
நானிலமும் போற்றவிந் நவமித் திருநாளில்
மானவனாய்* இந்த மண்ணில் பிறந்தானை, * மானவன்= மனிதன்
நானகத்திலே இருத்தி நவமியிந் நன்னாளில்
பானகமும் மோர்நீரும் படைத்தே பணிந்திடுவேன்
ஞானமெனை அடைந்து சேர.
நாளை ஸ்ரீராமநவமி.
இந்த நாளையொட்டி இரு சிறு பாடல்கள்
அன்புடன்
ரமேஷ்
பூரி ஜகன்னாதர்
சென்ற மாதம் 50 PLUS VOYAGERS என்ற நிறுவனத்தாரால் ஏற்பாடு செய்யப்பட்ட ஒரு சுற்றுலாப் பயணத்தில் நானும் என் மனைவியும் பங்கேற்றோம். ஆறு நாட்கள் பயணித்து ஒரிசா மாநிலத்தின் பல இடங்களுக்குச் சென்றோம். இவற்றில் ஒன்று புகழ் பெற்ற பூரி ஜகந்நாதர் கோயில்.
சாதாரணமாக எல்லா கோவில்களிலும், கடவுளர்கள் தத்தம் மனைவியருடனே சேர்ந்திருந்து அருள்பாலிப்பதையே ( சிவன்-பார்வதி, விஷ்ணு-லட்சுமி, முருகன்-வள்ளி,தெய்வானை ) பார்த்திருக்கிறோம். ஆனால் இந்தக்கோவிலிலே ஒரு வித்தியாசமாக மூலஸ்தானத்தில் கிருஷ்ணர் தனது மனைவி சத்யபாமாவுடன் சேர்ந்து தரிசனம் தராமல் , தனது சகோதரன் பலராமனோடும், சகோதரி சுபத்திரையுடனும் சேர்ந்து தரிசனம் தருகிறார்! இதன் தாத்பரியம் சரியாகப் புரியவில்லை! தெரிந்தவர் யாரேனும் சொல்லுங்களேன்!
கூடப் பிறந்தோருடன் கண்ணன் தரிசனம் தருவதை பற்றி ஒரு சிறு பாடல், வெண்பா வடிவில்!
அன்புடன் ரமேஷ்
தன்னுதிரத் தோடுதித்த தங்கை தமையனையும்
தன்னுடனே கர்ப்ப கிரஹத்தில் கூட்டிவைத்து
கண்ணனவன் காட்சிதரும் மாட்சியினைப் பெற்றதுவாம்
மன்னுபுகழ் பூரித் தலம்
(பல விகற்ப இன்னிசை வெண்பா)
கடலோரக் காட்சி
நண்பர் அரவிந்த் பகிர்ந்து கொண்ட படம். அது பற்றி ஒரு பாடல்.
இப்பாடலுக்கு விளக்கம் தேவையில்லை.
அன்புடன்
ரமேஷ்
அரவம் இன்றி இரவின் மடியில்
-----இன்னும் உறங்கும் நகரங்கள்
இருளைப் பிளந்து கண்கள் சிமிட்டும்
-----தெரு ஓரத்து மின்மினிகள்
சிறிதே வெளுத்து சாம்பல் நிறத்தில்
-----சிற்றலை ததும்பும் சமுத்திரங்கள்
அருணன் வரவை மறைக்கும் சிறுதிரை
-----அரைச் சாம்பல்நிற மேகங்கள்
பிறிதோர் காலை அரும்புமித் தருணம்
-----செந்நிறச் சாயலில் ஒளிர்வானம்
பரிதியின் கதிர்முழு வான்நிறைக் கும்வரை
-----மேலே மிதக்கும் மேகங்கள்
தரிசனம் செய்ய இக்காட்சியின் அழகை
-----இவ்விரு கண்கள் போதாதே
எழுவாய்- செயப்படு பொருள்- பயனிலை
இந்த மார்கழித் திங்களன்று அதிகாலையில் எழுந்து கண்ணனை வணங்கக் கூறும் ஒரு சிறு பாடல் - தமிழ் வாக்கிய வடிவமைப்பைக் குறிக்கும் சில வார்த்தைகளின் - (எழுவாய்- செயப்படு பொருள்- பயனிலை ) --சிலேடைப் பயன்பாட்டுடன் !
அன்புடன்
ரமேஷ்
எழுமின் திசை*யில் கதிரவன் எழுமுன்
எழுவாய் தினமுமிம் மார்கழி மாதம்.
குழுவாய்க் கோவில் சென்றே தொழுவாய்
குழலூ திடுவோன் கண்ணன் கழலை.
வியலகம்** வாழும் உயிர்நிலை அனைத்தும்
உயர்நிலை அடைய வணங்கித் ^^ துதித்தல்
செயப்படு(ம்) பொருளை பாடுதல் அன்றி
அயலுரை*** யேதும் பயனிலை, இலையே !
* எழுமின் திசை = கிழக்கு
** வியலகம் = பூமி
*** அயலுரை = பிற பேச்சுகள்
^^ துதித்தல் செயப்படு(ம்) பொருள் = துதிக்கப்படும் இறைவன்
எனக்குப் பின்னால் என்னாகும்?
ராமேஸ்வரம் கஃபே
நானும் எனது குடியிருப்பில் இருக்கும் சில மூத்த குடிமக்களும் (senior citizens) இரண்டு நாட்களுக்கு முன் அருகிலிருக்கும் ராமேஸ்வரம் கஃபே விற்குச் சென்றிருந்தோம். அங்கு நாங்கள் உண்ட சுவைமிக்க சிற்றுண்டிகளைப் பாராட்டி ஒரு பாடல்!
அன்புடன்
ரமேஷ்
பி.கு : சில வருடங்களுக்கு முன் சென்னை ரத்னா கஃபே யின் இட்லி சாம்பார் பற்றிய ஒரு பாடலும் இத்தத்துடன் இலவச இணைப்பு! இட்லிப் பிரியர்களுக்கு சமர்ப்பணம்!
https://kanithottam.blogspot.com/2019/11/blog-post_18.html
