ஆனந்தத் தாண்டவம்

ஆனந்தத்  தாண்டவம்

இன்று சிவராத்திரி. 

தில்லையில் ஆனந்தத்  தாண்டவம் ஆடும் நடராஜப் பெருமானை வணங்கி 

ஒரு பாடல் -- 

அவர் திருப் பாதங்களில் சமர்ப்பணம்.

அன்புடன் 

ரமேஷ் 

விரித்த சடை; உடல் தரித்த நீறு ;    
சிரித்த செவ்விதழ் ;சீறும் செந்தீ
தெறித்து திரிபுரம் எரித்த நுதற்கண்;
உரித்த மதகஜத்  தோல் மேலாடை.

கடலைக் கடைந்த கயிறில் விளைந்த *  
விடத்தை உண்டு கருத்த கண்டம்;
கொடுவரித்** தோலை கட்டிய சிற்றிடை;  
விரிந்த தோள்கள்; பரந்த மார்பு.

அடிக்கும் உடுக்கை ஏந்திய ஒருகை;
சுடுமொளி  ஜோதியை ஏந்திய ஒருகை;
விடமுடை படவர# வணிந்த ஒருகை;            
அடிவிழு எனவர வணைக்கும் ஒருகை.

படுத்துக் கிடக்கும் அரக்கன் மேலே
எடுத்து வைத்து அமிழ்த்தும் வலக்கால்;
மடித்து உயர்த்தி மேலே தூக்கி
நடனம் புரியும் இன்னொரு இடக்கால்.

ஆக்கல் காத்தல் அதன்பின் அழித்துப்
போக்கல் மீண்டும் ஆக்கல் என்று
உலகை ஆட்டும் அலகில் நடனம்
தில்லையில் ஆடும் தேசனைப் பணிவோம்.


* மத்தாக இருந்த மந்தார மலையைக் கடையும் கயிறாக இருந்த வாசுகி என்னும் பாம்பு
**கொடுவரி - கொடும்புலி
# விடமுடை படவரவு= படமெடுக்கும் விஷநாகம்