சாதனையாளர்கள்

சாதனையாளர்கள் 

இரண்டு நாட்கள் முன்பு உலக அளவில் சாதனை புரிந்த இரு இந்தியப் பெண்கள் இவர்கள்!

இவர்களுக்கு கிடைத்த பாராட்டுகளிலும் , பரிசுகளிலும்  எவ்வளவு வித்தியாசம்!

என் நண்பர் முரளிதரன் எங்கள் வாட்ஸப் குழுவில் பகிர்ந்து கொண்ட ஆதங்கத்தின் தூண்டுதலில் எழுந்த பாடல் இது 

அன்புடன் 

ரமேஷ்   

Ramesh · Achivers

சாதனையாளர்கள் 

தேதி - 14-12-2021

ஹர்னாஸ் சந்து - பிரபஞ்ச அழகிப் போட்டியில் முதலிடம்  

நீனா குப்தா - கணித மேதை ராமானுஜம் பரிசு 

 

இந்திய மங்கையர் இருவர் இந்நாள் 

தத்தம் துறையினில் சாதனை செய்தார்.

அழகுப் போட்டியில் வென்றார் ஒருவர் 

அறிவுப் போட்டியில் வென்றார் ஒருவர் 

முந்தையர் முதலிடம் பெற்ற செய்திகள்

முதலாம் பக்கச் செய்தியாய் மிளிர 

பின்னவர் பெற்ற பதக்கச் செய்தி 

பின்னொரு பக்கம் புதைக்கப் பட்டதே!                                                                                                                                                                     

அழகுப் போட்டியில் வென்ற  வருக்கோ 

ஆயிர மாயிரம் பாராட்டு களாம்!

அறிவுப் போட்டியில் முதலிடம் பெற்றால் 

வருமோ இத்தகு வாழ்த்துகள் எல்லாம் ?

எண்கணி தத்தில் ஏற்றம் கண்டு 

எவர்க்கும் இயலா தேற்றத் தீர்வை 

கண்டு பிடித்த காரிகை இவரை 

வந்து அடைந்த புகழ்மிகக் குறைவே!

முப்பன் னிரண்டு மேலும் கீழும் 

இருபன் னிரண்டோ  இடையின் அளவு!

இந்தக் கணிதம் மட்டும் அறிந்தோர் 

எண்கணி தத்தை எங்கனம் அறிவார்?

பளிச்சென மின்னும் வெளிப்புற அழகை 

மட்டும் மதித்து மற்றவை மறந்தார்!

உள்ளொளிர் திறமையை மதித்துப் போற்றும் 

காலம் வருமெனக் காத்துக் கிடப்போம்!