எச்சில்

நாடெங்கும் "தூய பாரதம் " (ஸ்வட்ச் பாரத் ) பற்றி பெரிதாகப் பேசப்பட்டு வரும் இந்த நேரத்தில் "எச்சில்" பற்றிய ஒரு கவிதை- .ஒரு புதிய கோணத்தில்!

" எச்சிலா" என்று  முகம் சுளிக்கிறீர்களா? "உமிழ் நீர் " என்றால் பரவாயில்லையா? இரண்டும் ஒன்றுதானே!
(ஆங்கிலத்திலும் இது போலத்தான்! saliva வும் spittle ம் !)

"எச்சில் " க்கு பதிலாக "உமிழ் நீர் "என்று போட்டுப் படித்தாலும் சரிதான்.
ரசிப்பீர்கள் என்று நம்புகிறேன்.

அன்புடன்
ரமேஷ் 

வண்டின் எச்சில்  தேனாகும் - நல்
நத்தையின் எச்சில்  முத்தாகும்
வெண்பாற் கடலைக் கடைகையிலே
விளைந்த எச்சில் அமுதாகும்!

சிலந்தியின் வாயில் வடிகின்ற
எச்சில் விரிக்கும்  வலையாகும்.
நீள்சிறைப் பறவையின்* எச்சிலுமே  * swift /swallow
கூட்டைக் கட்டும் சாந்தாகும்.

கன்றினை நக்கிடும் தாய்ப்பசுவின்
உமிழ்நீர் எச்சில் பன்னீரே!
நலிந்தோர் துயரால்  கலங்குகின்ற
கண்களின் எச்சில் கண்ணீரே!

மேகத்தின் எச்சில் மழையாகும் - விஷ
நாகத்தின் எச்சிலும் மருந்தாகும்.
தேகங்கள் புணர்ந்து உணர்கின்ற சுக
போகத்தின் எச்சில் அன்றோ நாம்!. 

வண்ணங்கள் குழைத்துத் தூரிகையால்
துப்பும் எச்சில் ஓவியமே!
எண்ணங்கள்  இணைத்து  எழுத்தாக
உமிழும் எச்சில் காவியமே!


பி.கு :
"வண்டின் எச்சில் " என்ற பிரயோகத்தை  , சமீபத்தில் படித்த சித்தர் சிவ வாக்கியரின் பாடல் ஒன்றில்  கண்டேன்.  அதன் உடனடி உந்துதலே  ( சித்தம் தெளிவிக்கும் சிவவாக்கியர் பாடல்கள்- செய்யுள் எண் 34 ). இந்தக் கவிதை.
இதை எழுதி முடித்து பதிப்பிப்பதற்காக draft ஆக வைத்துவிட்டு, மீண்டும் மேற்கூறிய செய்யுள் தொகுப்பை படிக்க ஆரம்பித்தேன்.
எச்சில் பற்றிய , ஒரு தத்துவார்த்தமான கோணத்துடன் கூறப்பட்ட ,இன்னும் இரண்டு செய்யுள்கள் - (41 மற்றும்  42 ) படித்து வியந்தேன். பின் ஒரு நாள் அவற்றைப் பகிர்ந்து கொள்கிறேன்.

 .